–Chaqmaqtek Zulmet Qoynida Wallide Chaqting, Yorutup Qarangghu Dunyani Nurungni Chachting!
-Kurasch Umar Atahan
Autori: Mehrinisa Ismail- Kurasch
>>>☆<<<
Méhrinisa Ismail Kurash (1968-2025) Uyghur jemiyitide yetiship chiqqan ali derijilik jornalist, mexsus filim regisori, terjiman, Ana Til Muellimi we Talantliq bir ediptur. Méhrinsa Ismail-Kurasch 1968.yili 10.ayning 19.küni Wetinimiz Uyghuristanning qeshqer sheheride bir wetenperwer, milletperwer we meripetperwer bir ailide dunyagha kelgen.
Edip Mehrinisa Ismail- Kurash Bashlan’ghuch we Ottura mektepni öz yurti Qeshqer sheheride oqup, 1984.yili Uyghuristan Universitätining Filologiye inistitutigha qobul qilin’ghan.
Mehrinisa Ismail Kurash Mezkur mektepni 5 yil oqughandin kéyin, Ürümchi sheherlik Telviziye istansisigha muherir we terjiman bolup Ishqa Chüshken.
Merhum méhrinisa isma’il 1968-yili 1-ayning 19-küni qeshqerde tughulghan, 1984-yili shinjiang uniwérsitétining edebiyat fakultétigha oqushqa kirgen. Aliy mekteptiki chéghidila uning shé’iriyet we sen’et sahesidiki talanti namayan qilin’ghan.
Edibe Méhrinsa Ismail-Kurashning sennet qabiliyiti küchlük bolup, shinjiang uniwérsitétning edebiyat fakultétida oquwatqan mezgilidila, oqughuchilar arisidiki konsért pirogrammilirining aktip ishtirakchiliridin biri bolup tonulghan bolsa, “Shinjang yashliri zhurnili”, „Shinjiang Maarip Géziti“, Shinjiang Ishchilar Géziti“ qatarliq Uyghurche zhurnal we gézitlerde élan qilin’ghan lirik shé’irliri, ilmi maqaliliri we edebiy obzorliri bilen Uyghur oqurmenlirige tonulushqa bashlighan. 1993-Yilidin 2004-yilghiche ürümchi Radio-téléwiziye istansisining Uyghur bölimide xizmet qilghan. Méhrinsa Ismail-Kurasch Xanim, mezgilide, u ishligen “Nezer”, “Chin yurektin-chin sözler”, “Didar gheniymet” qatarliq pirogrammilar we bashqa edebiy eser pirogrammiliri Uyghurlar arisida qarshi élin’ghan. Jornalist Méhrinsa Ismail Öz nöwitide qelimi ötkür edip bolup, Méhrinisa isma’il xanimning “Perishtige jawab”, “Gül naxshisi”, “Chüsh”, “Qizimgha”, “Namerd dunya”, “Hayat naxshisi”, “Uning yüriki” qatarliq bir qisim shé’irlirini wekil xaraktérgha ige dep qarashqa boidu. Méhrinsa Ismail xanim yene özining shé’irlirida hayat, a’ile, muhebbet, perzent söygüsi, ana yurt témisidiki, tatliq séghinishliq eslimilerni tilgha alghan yuqiri bedi’iy maharette bayan qilin’ghan liqini “Chüsh”, “Qizimgha”, “Sen qal chüshümde” dégendek birqatar lérik shé’irlarnimu yazghan.
Mehrinisa Ismail Kurash Ürümchi Radio-Télviziye Idarisida özining talantini jari qildurup, axbaratchiliq we maarip heqqide nurghun nadir Eserlerni yazghan we Programmalarni Öz aldigha pilanlap ishligen. Bolupmu Uning Alim Abdushkur Memtimin, Shair Tiyipjan Eliyof, Yazghuchi Zorudun Sabiri, Terjiman Tohti Baqi Artushi, Dangliq neshriyatchi Ehet Hashim heqqide ishligen mexsus programmiliri xelqimiz arisida küchlük tesir peyda qilghan. Mehrinisa Ismail- Kurasch téma tallashta usta, qelem tewritishte chaqqan, pikirini ipadileshte mahir bolghachqa kespi sewiyesi tiz ashqan we 20 din artuq her türlük memkliketlik, Autonum rayon, sheher we idare derijilik mukapatlargha érishken. Ixtidarliq we talantliq Uyghur ziyalisi Méhrinsa Ismail 2005. yilghiche mezkur Idarede bashta addi xizmetchi, Kéyin bölüm bashlighi we aliy derijilik jornalist bolup xizmet qilghan.
Aliy Derijilik Journalist Méhrinsa Ismail-Kurashning ijadiyiti biz yoqurda éyitqandek Aliy Mektepke chiqqandin kéyin bashlanghan bolup, özi 2025.yili 02.ayning 17. Küni wapat bolghiche bolghan ariliqta 300 parchidek her türlük janirdiki eserlerni yazghan we bashqa tillardin Uyghur tiligha terjime Qilghan.
Mehrinisa Ismail Kurasch 2005. Yili Gérmaniyege köchüp kélip, ailisi bilen jem bolup yashighan. Edip Mehrinisa Ismail Kurasch Uyghur Ziyalisi Kurash Atahanning Ömürlük Hemrayi Bolup, ikkisi 40 Yilliq Dost, 34 yilliq er xotundur! Er-Ayal ikkeylen 4 Perzentning Ata-Anasi, ikki newrening chong ata, chong anasidur!
Mehrinisa Ismail Kurasch Gérmaniyediki yillarda asasen digüdek shieriyet ijadiyiti bilen shughullan’ghan bolup, eserliride
Asasen digüdek muhajirettiki musapir bir ana Uyghurning wetenperwerlik, milletperwerlik we meripetperwerlik iddiysi ekis ettürülgen.
24.03.2025 Gérmaniye
K.U.A
☆☆☆><☆☆☆
Oyunchuq
Autori: Méhrinsa Ismail
Yasiwaldim oyunchuq ,
Yersharigha oxshaydu.
Tépip teklimakanni ,
Dilim shundaq yayraydu.
Derya sizdim men eshu.
Qaghjirighan qumlargha.
Sheher saldim qedimiy ,
Bowam mangghan yollargha.
Julalidi wetinim
Shebnem chüshken chichektek .
Qarap ,qarap toymaymen ,
arzuyumgha yetkendek .
1993.08.13 Ürümchi
☆☆☆><☆☆☆
Aslinim
Autori: Méhrinsa ismail
Kichikkinë aslinim ,
Bek chirayliq bek omaq .
Esip qoydum boynigha ,
Altun rënglik qongghuraq.
Kitap körsem yenimda ,
Jimjitqinë olturar .
Charchighanda tëng uxlap ,
Tang sëhërde oyghunar.
Mën mëktëpkë këtkëndë ,
Köremdikin u kitap .
Yansam ëgër mëktëptin ,
Yügrëp chiqar aldirap.
Uning omaq qiliqi ,
Küldüridu kishini ,
Qarap qalar anammu ,
Tashlap qoyup ishini .
28.09.1995 Ürümchi
>>>☆<<<
Qizil Gülüm
Autori: Mérinsa Ismail Kurasch
>>>☆<<<
Qizil gülüm…
Bahar keltürding rohimgha.
Sanggha Béqip,
Güller échildi köngül béghimda.
Qizil gülüm,
Sening sayengde,
Xushnawa Bulbullar Uwa tizdi béghimgha.
Qizil gülüm,
Sening Sayengde…
Qelib asmanim,
Pürkendi yoruq yultuzlargha.
Söygü qushliri,
Makan tutti qelbimdiki tik qiyalarni,
Söygü,
Muhabbet
We Erkinlik dep parlidi yoruq cholpanlar
Qizil gülüm…
Sening sayengde,
Rengdar qushlar,
Neghme nawa qilar süzük sular éqiwatqan jiralarda…
Qizil gülüm…
Bulbullar sayraydu,
Tikiningdin gülleringning baghrini tilip qanitip,
Söygü bérip,
Ornigha…
Ashiqlarning jénini élip.
Gherip- Senem…
Tayir-Zöhre…
Perhat-Shirin…
Leyli-Mejnun…Sersan sergerdan Muhabbet bayawinida!
Qizil gülüm…
Kim deydu,
Bahar rohqa kelmeydu, dep,
Muzlar érip,
Rohim illighandin kéyin,
Söygü
Tanglirim atti arqa arqidin.
Muhabbet yultuzi parlap,
Güller ghunchilidi hijran béghida.
Wadilar gül-chichekke pürkendi,
Bayram boldi köngüller baghchisida.
Gül derexliri yashnaydu,
Su quyup tursam baghchamgha…
Bix süridu,
Ghunchilaydu,
Gül achidu müshki emberdek…
Xushbuy Puraq chachidu, toxtawsiz Her ikki dunyagha….
Qizil gülüm…
Kim deydu,
Bahar kelmeydu, dep köngül béghigha…?!
Qizil gülüm…
Söygü kérek
Muhabbetning yashnishigha….
Gül Yoqtur,
Chichek Yoqtur,
Yashnimaydighan,
Jan Süyini köngülnung
Quyup tursang nawada!
Qizil Alma misali,
Qizil Gül söygü bilen Ghunchilaydu.
Qizil gülüm…
Su quydum,
Gülüm bix sürdi köngül béghimda,
Jan Süyi quysam Gülümge-
Ghunchilaydu,
Échilidu…
Jahan’gha Xushbuy puraq chachidu toxtawsiz…
Meger söyülmise
Qizil güller….
Quyulmisa jan süyi…
Muhabbet
Aptipigha qaqlanmisa….
Sarghiyidu yapraqliri,
Sulidu sihirlik bergi,
Qaghjiraydu serwi boyliri…
Quruydu baraqsan shaxliri… Amansiz we waqitsiz…
Qizil güllerning,
Bérilmise muhabetlik jan süyi…
Gülleri tozghaqtek tozisa,
Qaghjirisa serwi boyliri,
Sulsa ruxsari,
Yapraqliri sarghaysa,
Tozisa külgün bergi,
Qurup kétidu hayati,
Ming mertem,
Isit dep waysighan’gha perwasiz!
Biz ademler,
Qizil gülge oxshaymiz…
Kün nurini söyimiz…
Yamghur yaghsa yashnaymiz….
Tikilsek munbet tupraqlargha…
Su quyulsa qerellik,
Bap baraqsan kökleymiz…
Qizil gülüm…
Bix sürimiz….
Ghunchelaymiz…
Échilimiz,
Xushpuraqlar chachimiz….
New baharda kökleymiz…
Kün nurida yashnaymiz,
Dalilarni qaplaymiz…!
Söygü imip tebiyettin,
Chichekleymiz,
Ghunchilaymiz,
Échilimiz…
Söygü…
Muhabbetke chümüleyli…
Qizil gülüm…
Shepqetlik bolayli…
Ayimayli Méhribanliqni,
Illitayli
Söyeyli…
Söyüleyli…
Muzlighan qeliblerni söygü nurida
Su quyayli bir birimizge…
Menggüge yashnap tursun muhabbet bilen,
Bizge Ümüt we küch bergen hayatliq baharimiz!
25.03.2011 Gérmaniye
☆☆☆><☆☆☆
Oghlumgha….
Autori: Mérinsa Ismail Kurasch
>>>☆<<<
I
Biz bir ulugh milletning ewladi,
Shan-Sheripini tartquzup qoyghan…
Biz bir mehkum millet,
Ar we nomus astida qalghan….
Biz hürlükni Arzulaymiz,
Biz Zulumdin qutulsaq dep oylaymiz…
Bir wijdanliq anisi,
Bir mezlum milletning,
Hür yashisam deydu….
Bir oghul tughsam….
Wetenni azat qilsa,
Erkin we azade dewran sürmekni oylaydu.
Oghlum,
Men bir Uyghur anisi,
Pexirlinimen Uyghurlughumdin….
Emma lékin,
Nomus qilimen,
Mehkumlughumdin.
Shunglashqa, Yashaymen ökünüsh ichre,
Qulluq tamghisi,
Öchürülüp,
Ketmigüche pütünley pishanemdin….
Bir oghal tughsam…
Qilichini shiltip,
Büyük ejdadim Oghuzxaqandek….
Nere tartip,
Mömünlerning emri,
Hezreti Ali, Shayhyi merdandek…
Qutuldursa milletni,
Azat qilsa ishghaldiki Wetenni…
Dep oylap,
Seni tughdum jénim oghlum!
Kiche kündüz,
Alqinimni échip,
Qollirimni igiz kötürüp,
Duada boldum,
Séni Wetenning ümüdi,
Séni Milletning pahsibani bolsun dep….!
II
Sen xelqimizning,
Ümüdini aqla,
Halallap yasha men bergen Appaq sütni….
Bir oghol tughdum,
Weten’ge, Milletke atap…
Shunga ismingni,
Atang bilen köp oylap,
Bir ulugh qehrimanning,
Tariximizdiki,
Nami bilen shereplendürduq….
Her qétim atighanda ismingni …
Esleymiz shanliq yillarni….
Pilanlaymiz hür we Azat dunyani….
Her qétim sanggha qarisam,
Oghlum disem,
Barche Uyghurlardek,
Yürügim ümütke,
Wujudum küchke,
Tolidu Rohim hem jasaretke….
Oghlum disem,
Kuch quwetim, jasaritim ashidu.
Oghlum,
Oghlum disem aghzimgha patmaydu isming,
Sen tughulup dunyagha,
Téngi atti Zulmet ichidiki hayatimning.
Sen tughulup,
Quyashi parlidi arzu-armanlarning.
Sen tughulup,
Küldi taghu hem tashliri ghemkin Wetenning….
Küp-kök chirayi nurlandi meyüs Asmanlarning!
Oghlum,
Bir Oghul tughulsa,
Meger…
Bexitke chümülidiken Yer…
Bexitke chümülidiken hem Asman…
Eger bir erkek Arislan tughulsa,
Reqipler yighlaydiken,
Shatlinidiken milliti,
Emdi bozek bolmaymiz,
Düshmenlerge, dep.
Bir Erkek ewlat tughulsa
Tagh we deryalar hem bayram qilip yashaydiken,
Jasariti ashidiken…
III
Oghlum…
Köp xorlanduq,
Izilduq Zulum Astida perishan qalduq….
Ghorurimizni,
Sheripimizni…
Nomusimizni…
Biz qoghdashqa muhtaj her zaman….
Biz yashisaq wijdan bilen,
Shanimiz yüksilidu,
Parlaydu béshimizda altun taj haman…
Yashiyalmisaq,
Ghurur we Sherep bilen…
Lenetleydu,
Biz tughulghanda külgen yer jahan…!
Oghlum,
Hayating japaliq,
Yolung shereplik….
Qoghda oghlum sheripini Uyghurlarning …
Yükselt oghlum shanliq bayrighini Uyghuristanning….!
Rabbim bizge…
Eqil bersun,
Wijdan bersun…
Qoghda oghlum sheripini
Millitimizning,
Jénimiz qurban bolsun,
Hürliki üchün Ulugh Weten Uyghuristanning…!
Oghlum sen méning ümüdüm,
Mang ejdatlar achqan yolda….
Bir qolunggha qural al zulumgha,
qarshi,
Igiz kötür,
Ejdatlar mirasi kök bayraqni,
Wetenning Azatlighi yolida,
Harmay, talmay ubir qolungda…
Oghlum qorqma,
Erkinlik mensuptur,
Irade qilghanlargha….
Qorqqaqlar paxaldek dessilidu,
Ghalip we qehrimanlar yolida….
Oghlum…
Sen bizning ümüdimiz…
Sen bar yerde,
Üstün tursun ming yilliq shan-sheripimiz….
Shunglashqa,
Ismingnimu Atilla qoydi dadang,
Sen bar yerde yene parlaq bolsun istiqbalimiz!
Oghlum,
Qulluq yarashmaydu…
Bürkütler ewladigha…
Kök büredek erkin, hür yasha…
Yol körsetsun sanga,
Alip Ertungga,
Egeshkin Tengriqut Oghuzhan bashlighan yolgha….!
Oghlum….
Ejdadingni unutma….
Ata-Anang Su bashlighan,
Xasiyetlik ériqlarni qurutma!
Oghlum….
Arliship ketmisun,
Hich waqit It izi, At izigha…
Kim dost,
Kim düshmen ügen tarixingdin ügen tursun yadingda …
Oghlum…
Mang
Oghuz Haqan,
Afrasiyap,
Atilla Han,
Istemi,
Ilterish,
Bilge qutluq,
Sultan Saltchuq yolida….!
IV
Oghlum….
Oyghaq tut shuurungni,
Su uxlusa uxlaydu,
Düshmenler hich uxlimaydu, Digeniken babayi ejdatlarimiz…
Ghapilliq,
Bengwashliq,
Bixutluq,
Ebgahliq yarashmaydu hür insanlargha….
Horunluq,
Qorqunch…
We wijdansizliq…
Chiqti milliyonlar béshigha….
Oyghaq yasha…
Millitingning…
Erkinlik,
Adalet…
Hürriyet qilichi bolup,
Yoqalsun,
Milletke musallat
Bolghan Qulluq,
Yoqalsun Uyghurlar duchar bolghan
Mehkumluq,
Yoqalsun Zulum we Bexitsizlik!
Nomusimiz paklansun, Hüriyet, Azatliq Tangliri Atsun!!!
Oghlum….
Yür heqiqet yolida…
Ölsengmu….
Teslim bolma,
Yür yigitlik yolida….
Turiwermusun,
Weten ishghalda,
Millet Mehkumluqta….
Bu Millet
Zulumdin qurtulsun, Artuq Emdi Hüriyet tangliri Atsun!
24.02.2018 Gérmaniye
☆☆☆><☆☆☆
Bahar Kelse…
Autori: Mérinsa Ismail Kurasch
>>>☆<<<
Bahar Kelse,
Chillap kéler Nuruzni….
Tebrikleymiz,
Yéngi yilni, Yéngi pesilni…
Chuwulup chiqip
Kéter,
Ademler öyidin…
Bahar kelse,
Jel-Janiwarlar oxchup chiqar uwisidin….
Bahar kelgende,
Qushlar,
Aylinip uchishidu… Yiraqqa ketmeydu öyümning etrapidin…
Bahar kelse,
Qushlar qaplar etrapni,
Biri kétse qanat qéqip,
Neghme nawa qilishidu,
Yene biri puruldap uchup kélip.
Bahar kelse,
Qushlar qaplaydu yéshil wadilarni,
Édir we bozqirlarni.
Bahar kelse
Ormanlar kétidu qaynap,
Etrapni hayat zewqi,
Gül-gülüstandek kétidu qaplap.
Bahar kelse,
Hayat jush uridu ormanda,
Qushlar sekriship,
Shaxtin shaxqa…
Sayraydu xush pichim awaz bilen her yanda.
Bahar Kelse,
Nesiwimizni alimiz,
Qushlarning shat neghmiliridin,
Xushalliq tolidu dillargha,
Su ichidu köngüller köngüllerdin….
Bahar Kelse,
Qushlar naxsha oquydu,
Shaxtin shaxqa sekrep ussul oynaydu!
Bahar Kelse,
Qushlarning bezmisidin, Ghemkin köngüller yayraydu.
Bahar kelse,
Ademlerning jéni ichige patmaydu,
Ademlermu
Köngli yayrap qushlardek…
Etrapni bayram shatliqi qaplaydu….
Bahar kelse…
Untulup qish zimistan,
Perishan köngüllerge,
Nuruz shatlighi patmaydu.
Bahar kelse,
Adem qushtek sayraydu,
Bahar kelse,
Qushlar bizdek oynaydu…
Bahar kelse
Adem, Qush dep ayrilmaydu …
Dostlishidu,
Juplishidu,
Muhabbetlishidu….
Köngül
Köngüllerdin su ichsun, dep,
Béqishidu, Quchaqlishidu, Söyüshidu!
Kashki,
Ademlermu qushtek bolsa,
Bir birige sadiq bolsa,
Ölgüche ayrilmisa, Birge bolsa,
Birlikte,
Derex shéxigha qonsa,
Qénip, qénip sayrisa …
Dertmen köngüllirini paylashsa…
Dostlashsa,
Muhabbetleshse,
Düshmenleshmey yashisa!
Ademlermu
Qushlarsiman yashisa,
Bir birige qol qanat bolsa…
Söygü…
Merhemet…
Béghishlisa bir birige,
Sadiq we semimi bolsa,
We
Izzet baghchisida birge Yashisa….
Ademlermu
Qushlardek Wijdanliq Bolsa,
Bir Birige qara sanimay yashisa…
Yetsek birlikte murat we meqsetlerge,
Dunya gül-chichekke qaplinip…
Bahar kelse, Nuruz kelse…
Hayatliq mol menagha tolsa!
Bizmu Qushlardek,
Jennettek baghchilarda
Xendan ursaq,
Semimiyet yolida dostlashsaq,
Sadaqet yolida
muhabbetleshsek,
Düshmenleshmisek…
Meqsetke yéter idi, aq köngül insanlar…
Dunya Bir jennetke aylansa
Bolar idi Her kün nuruz, her kün bayram, Her küni bahar!!!
12.05.2016 Gérmaniye
☆☆☆><☆☆☆
Yultuzlargha Söz…
Autori: Mérinsa Ismail Kurasch
1
Ilgirkidek qarangghuluqta,
wetenni oyludum tenhaliqta.
Yultuzlar guwa…
Wetendin ayrilishning,
Derdi bilen qoruldum,
Ayrilishning Chölliride,
Topa kebi soruldum.
Eske élip dost yarenlerni,
Ata-Ana, qérindash we yurtdashlarni,
Yana Ashu
Yirginchlik xiyallargha gheriq boldum.
Yultuzlar yighlaydu, échinidu halimgha,
Ata-Anam qeni,
Qerindash we qewmim qeni,
Yurtdashlar qéni,
Men kim,
Nimishqa ayrilduq,
Bundaq sirliqqine Qan-qérindashlardin?
Nimishqa emdi,
Qandaq chaghda, ne qismetke tughuldum?!
Wetenni oylap tün boyi,
Asaret qiltiqigha mehbuslardek boghuldum!
Yultuzlar biler,
Méning külli sermayemni.
Ichimde bir magma ot alidu,
Köydürüp kül qilar goya zulum dunyasini.
Kiche qushlirining awazi kéler,
Ochuq turghan penjirelerdin,
Bilmeymen bu qushlar,
Keldikin ne seweptin, qeyerlerdin.
Chaqmaq chaqidu yiraq taghlarda,
Güldürmama güldürleydu her tereptin!
2
Qeni u ata-ana, qeni u qan qérindash,
qeni u qewmim, ulusum, qeni u söygen dostlurum?!
Dunyaning hich yéridin,
tapalmaysen,
Télefonni,
Her türlük poshta we yollanmini,
Her türlük kélip kétishlerni,
Iinsanlarning,
Shexis we Ailiwi Alaqisini,
Kesken wehshiy zalimlarni….!
Qarangghuda, yétip karwatta,
Qarisam ata anamgha köz yetmes,
Towlisam qérindashqa awazim yetmes,
tutay disem doslirimgha qolum yetmes,
baray disem,
Kindik qénim tökülgen yurtqa yolum yetmes,
Wetinimni oylaymen,
Kök yüzige nezer tashlap gheribane penjirelerdin.
Penjirilerdin charesizlik dunyasigha qaraymen,
Zalimlarni lenetleymen,
Boghulup,
Boghulup bu tengsizlikke yighlaymen!
Kök qehride parlap turghan tolun Aydin,
Alemlerni Aydinglatqan Yultuzlardin,
halini,
Wetinim We Millitimning soraymen.
Ata Anam,
Qérindash we tughqanlarni,
Yurtumdiki tagh we deryalarni oylaymen.
Közemdin yütken janlirimgha,
Qelbimge bigiz sanchighandek azap ichide,
Qan yighlaymen, charesizche salam yollaymen.
Uzaqlarda wetinimni oylaymen,
Kichik balidek tal chiwiqni at étip,
Ashu men chong bolghan mehelilerde oynaymen.
Kök qehride parlap turghan tolun Aydin,
Alemlerni Aydinglatqan Yultuzlardin,
halini,
Wetinim We Millitimning soraymen.
Ata Anam,
Qérindash we tughqanlarni,
Yurtumdiki tagh we deryalarni oylaymen.
Penjiremdin,
Wetenni dep,
Anam bilen Dadamni,
Jan jiger qérindashlarning hali nichük dep,
Yiraqta parlap tughan Ay-Yultuzdin hal xatire soraymen.
Yultuzlar chüshenmeydu qelib sirimni,
Teselli béridu manggha, Emma chüshenmeymen tilini…
Boghulimiz charesizlik déngizigha,
Künler, Tünler, Kündüz, Kichiler…
Aylar, Yillar, Qeneler,
Xuddi taghdek döwlinip ötüp kétermu mushundaq?!
Ah Yultuzlar Yultuzlar…
Kördünglar zalimlarning heddidin ashqinini.
Ah Yultuzlar…
Ah Shamallar…
Ah Qushlar…
Élip kélinglar wetenning salami we saitini,
Élip kétinglar
Wetinimge´
Séghinish we
Hesret Nadametlerni…
Ayrilishning achchiq azabi,
Ikek bolup upritidu hayatim we jénimni!
3
Qarangghuda, yétip karwatta,
Qarisam ata anamgha köz yetmes,
Towlisam qérindashqa awazim yetmes,
Tutay disem doslirimgha qolum yetmes,
baray disem,
Kindik qénim tökülgen yurtqa yolum yetmes,
Wetinim séni oylaymen,
Kök yüzige nezer tashlap gheribane penjirelerdin.
Penjirilerdin charesizlik dunyasigha qaraymen,
Zalimlarning zawalini chillaymen,
Ichken süyümni zeher qilghan,
Yigen nénimni haram qilghan,
Kiygen kiyimimni képen qilghan,
Bizni paxaldek cheylep,
Zulum Otida köydürüp,
Külimizni shamallarda sorighan Zalimlarni lenetleymen!
Millitimge hürlük chillaymen,
Zalimlargha zawal chillaymen,
Eriz qilip rabbim Allahqa…
Weten dep, xelqim dep qangqir yighlaymen!
Tes bundaq tengsizlikke chidap yashash,
Atam dep, Anam dep, Qérindash we weten dep,
Uxlimaymen tün boyi,
Zalimlargha lenet oqup ich ichimdin,
Kündüzlerni kichilerge,
Kichilerni Kündüzlerge, Tünni Tanggha Ulaymen!!!
03.12.2017 Gérmaniye
☆☆☆><☆☆☆
Doppam
Autori: Méhrinsa Ismail/Nuzugum
Badam Doppam, Janijan Doppam,
Hösnümge hop Yarashqan Doppam.
Gül Doppam, Hür Doppam, Jan Doppam,
Ejdadlar Mirasi Qamlashqan Doppam.
Doppam Doppam Name Nishanem Doppam,
Uyghurlarning simasi julalar sende Doppam.
Doppam, Doppam Ghurur, Wijdanim Doppam,
Uyghurning Bayrighi, Parlaq Julasi Doppam!
Doppam, Doppam Shanu Shewketlik Doppam,
Doppam Doppam Hürmitim Eziz Doppam,
Nerge Barsam ezizlen´gen Izzitim Doppam.
Nede bolsam qedirlen´gen Zinnitim Doppam.
Doppam Doppam shanu shewketlik doppam,
Zep yarashqan Elni Söygen Berna qizlargha.
Doppam Doppam shanu shewketlik eziz doppam,
Zep yarashqan Arislandek Jessur Oghlanlargha.
Doppam Doppam shanu shewketlik doppam,
Millitim Sen Bilen érishti muhteshem gülsimagha.
Doppam Doppam shanu shewketlik eziz doppam,
Erkekning Tajisi, taqashturghan béshimizni samagha.
Doppam Doppam shanu shewketlik eziz doppam,
Ejdadimdin Manga miras Qalghan Janijan Doppam!
Seni Béshimizning Üstide Ulughlaymiz, Qedirleymiz,
Doppam Doppam shanu shewketlik Ulugh doppam!
2020.05.03 Gérmaniye Frankfurt
☆☆☆><☆☆☆
Bu seperde sen sürgün judun
Autori: Méhrinsa Ismail/Nuzugum
Qedemlirim tashlinar ghemkin,
Güzel,mamuq chèchek üstige.
Quyash parlar emma nazlinip,
Söyer qanmay halsiz léwimge.
Appaq süttek Ürük chèchiki,
Xine yaqti Shepeq renggide.
Kökrikimge taraldi qanreng,
Tomur boylap aqti u ten’ge.
Uchtum leylep közümni yumup,
Qar uchquni, goya chèchektek.
Tolghinimen tughulmaq üchün,
Zimistanni yarghan lichektek.
Ishenmekchi boldum pesilge,
Bu hayatning qaysi bahari ?!
Bahardimu titrise tèning,
Ishen bardur heqning jawabi.
Meyli Yaz bol ,meyli Qehritan,
Quchaqlidim, baghrimgha bastim.
Meyli Küz bol, meyli naz Bahar,
Közmunchaq qip boynumgha astim .
Bu seperde sen sürgün judun,
Men quyashni yürekke tangdim.
Bu seperde sen sürgün judun ,
Men quyashni yürekke tangdim!.
2022 . 21 .Mart Frankfurt.
☆☆☆><☆☆☆
Èsit …
Autori: Méhrinsa Ismail/Nuzugum
Wujudumda Partlar
Ot -Wolqan.
Charaslap köyer,
Qabahet belkim.
Hüjeyriler
tolghinar dehshet ,
Is-tüteksiz
Jengler destidin.
Qewrilerge
Tolsimu jismim,
Yèpip turar
Xain bedinim.
Közlirimmu
Usta yalghanchi,
Saxta Ashiq
Èsit lewlirim…
2022 .26.April. Frankfurt
☆☆☆><☆☆☆
Hayat chechiki
Autori: Méhrinsa Ismail/ Nuzugum
Akatsiye chècheklidi
Bir’az kèchikip.
Lèkin shükri,
Kütken iken
Mèni sèghinip.
Uga saptu Seghizxanmu
Yüreklik halda.
Ketken iken quzghunlarmu
Jeset izdiship.
Changgilarda
hayatliqning wichirlashliri.
Söygü bilen
Tumshuqlarning choqulashliri.
Xuddiy chölde,
Ussuluqning shirildashliri.
Yüreklerning ümidlerdin
Güpüldeshliri.
Püriqidur
Ewladimning wiliqlashliri.
Jilwisidur
Dostlirimning qut tileshliri.
San sanaqsiz aq kepterdur
Yelpünüshliri.
Emdi qorqmas
zulmetlerdin
Perizatliri.
2022.05.06 Frankfurt
☆☆☆><☆☆☆
Ana qelbi
Autori: Méhrinsa Ismail/Nuzugum
Qizim chaldi güzel lèrika,
Pianinuning söygü tilida.
Titrisimu nazuk tenlirim,
Shipa boldi miskin dilimgha.
Notilarning hesret mungliri,
Taralmaqta namert jahangha.
Wujudumni chirmidi hèjran,
Sèghinchimdin jènim anamgha.
Shipa izdep xeste könglümge ,
Bala bolghum keldi shu tapta.
Qarlighachning bachkisi bolsam,
Dan bersiken anam aghzida.
Közlirimdin sirghighan yashlar,
Temtiretti tatliq qizimni.
Yügrep keldi notini qoyup,
Sürtti yashni, söyüp mengzimni.
Yighlap saldi jenim oghlummu,
Yastuq qilip yümshaq köksümni.
Quchaqlidim chöjilirimni,
basalmastin öksüshlirimni.
Köz aldimgha keltürdüm bu ret,
Wetendiki sersan yetimni.
Aylansamken shu tap sumrughqa,
Köydürsemla bir tal chèchimni.
Barsam oqtek yènigha uchup,
Chachsam epsun xisletlirini.
Ay, yultuzlar söyse mengzige,
Perishtiler achsa ishikni.
2022. 11 Juni . Germaniye.
☆☆☆><☆☆☆
Chüsh…
Autori: Méhrinsa Ismail/Nuzugum
Tatliq bir chüsh kördüm seherde,
Yalghuzkensen Aliy mektepte.
Qup-quruqmish qizlar binasi,
Peste mèni saqlap kütkende.
Hushqurtarmish qehritan soghuq,
Qiraw baghlap kirpikliringge.
Peltuliring ucharmish yenggil,
Xiyalingda mèni söygende.
Közliringdin yanarmish uchqun,
Ay nuridin sholam chüshkende.
Yiraqlardin keptimen uchup,
Tuyghulurum buni sezgende.
Mèngiptimiz epsane kebiy,
Iz qaldurup qarlar üstide.
Kütüpxana peshtaqlirida,
Olturuptuq harduq yetkende.
Sarghuch,yumran, qoyuq chachliring,
Taralghanmish siliq keynige.
Parlar imish tamche yashliring,
Kiristaldek süzük mengzingde.
Yoqmish zulum,
Yoqmish xorluqlar,
Öliwelish, tehdit sèlishlar.
Haya,numus,tartinish peqet,
Bèrer imish söygüdin belge.
Oyulmasmish qelemturachta,
Yüreklermu ègiz tèrekke.
Mest qilghuchi shèrin bir puraq,
Örler imish cheksiz köklerge.
Qoyuptimen asta bèshimni,
Mezmut,temkin issiq mürengge.
Bighubar Qar lepildep uchup ,
Kömer imish bizni weten’ge.
2022.12.Öktebir. Germaniye
☆☆☆><☆☆☆
Puruch Qonchaq
Autori: Méhrinsa Ismail/Nuzgum
Anam tikti Puruch Qonchaq ,
Renglik shayi ,etleslerdin .
Yasap berdi dadam Böshük ,
Qélishmaydu qesirlerdin.
Baqsam anga bekmu tatliq,
Külüp turar bulaq közi.
Bölidim men qonchiqimni ,
Böshikige , aydur yüzi.
Eyttim mungluq elley Nachshamni,
Qétip Tarim ,Teklimakanni.
Puruch Qonchaq körgey chüshide,
Kümüsh chachliq Boghda Bowamni.
2021.12.22 Gérmaniye Frankfurt
Bu seperde sen sürgün judun
Autori: Méhrinsa Ismail/ Nuzugum
Qedemlirim tashlinar ghemkin,
Güzel,mamuq chèchek üstige.
Quyash parlar emma nazlinip,
Söyer qanmay halsiz léwimge.
Appaq süttek Ürük chèchiki,
Xine yaqti Shepeq renggide.
Kökrikimge taraldi qanreng,
Tomur boylap aqti u ten’ge.
Uchtum leylep közümni yumup,
Qar uchquni, goya chèchektek.
Tolghinimen tughulmaq üchün,
Zimistanni yarghan lichektek.
Ishenmekchi boldum pesilge,
Bu hayatning qaysi bahari ?!
Bahardimu titrise tèning,
Ishen bardur heqning jawabi.
Meyli Yaz bol ,meyli Qehritan,
Quchaqlidim, baghrimgha bastim.
Meyli Küz bol, meyli naz Bahar,
Közmunchaq qip boynumgha astim .
Bu seperde sen sürgün judun,
Men quyashni yürekke tangdim.
Bu seperde sen sürgün judun ,
Men quyashni yürekke tangdim!.
2022 . 21 .Mart Frankfurt.
☆☆☆><☆☆☆
Bahardiki chichekler
Autori:Méhrinsa Ismail/ Nuzugum
Bahardiki liwen chichekler,
Güzel idi xuddi peridek.
Jimirlayti shaxlar tajida.
Köz chaqatti yaqut,ünchidek.
Chachlirimmu chechikim idi,
Aqarsimu derdingde Pelek.
Tökülmekte lekin u shu tap
Elemliri eghir kelgendek.
Tutam – tutam chüshken chechimni,
Siqimdidim ,ateshte yandim .
Qizim bilen güzel Köl boyi ,
Mejnuntaldin raziliq aldim .
Söyüp turup ötken künlerni ,
Tal astigha awaylap kömdüm.
Taram – taram yash tökti mejnun,
Hesritimni samagha chachtim !.
Birelmidi belki berdashliq ,
Tökülüshke bashlidi chichek.
Sama toldi sersan güllerge,
Dertlirimge hemdem bolghandek.
Körüp qaldim lerzan chechimni,
Aqqulargha hapash bolghandek.
Widalashtim willide külüp,
Kiler bahardin xewer alghandek.
2022.26.mart. Frankfurt
☆☆☆><☆☆☆
Kütüsh
Autori: Méhrinsa Ismail/Nuzugum
Keldim yene ,
Tèz poyizning
Öter yoligha.
Qoniwaptu,
Mudhish qarghilar
Uning sürlük
Rèlis boyigha.
Körünmeydu
közge pilanlar,
Saetlermu
chikit noqtida.
Köchüp ketti
nege bu biket ,
Yol bermek bop,
Qaysi kariwangha?
Ötkinide
Közümdin uchup,
Aq Tèzpoyiz
Yilan yolida.
Sozulmaqta
rohim rèlistek,
Anam qalghan,
Öyüm qalghan,
Reyhan, Serin
Hedigha qanghan ,
Enjür,Anar
tilimni yarghan,
Tomurliriim
Yiltizlanghan,,
Esit, shutap
Peryatqa tolghan,
Asiyaning
kindiki bolghan –
Ipek yoligha.
Chünki bardur,
Öyning achquchi,
Weten purap
Turghan qoynumda .
2022.16. April . Frankfurt
☆☆☆><☆☆☆
Aqar yultuz qissisisi
Autori: Méhrinsa Ismail-Kurash/ Nuzugum
Aqti Sansiz Nurluq yultuzlar,
Yawuz tünning zulmetliride.
Güzel Aymu qangha milendi,
Charisizlik qismetliride.
Tolghinidu qum barixanliri,
Teklimakanning Ateshliride.
Zikri qilar shamal seghinip,
Igisining shepqetlirige.
Mewj urar chuqan Dolquni,
Tangning qizghuch shepeqliride.
Yuyunmaqchi Lale paklinip,
Hör seherning shebnemliride.
Yultuzlarning qewrisi bardur,
Yulghunlarning yürekliride.
Bir yultuzdin tughular mingi ,
Behishkirem köchetliride .
2022 . 23.May .Frankfurt
☆☆☆><☆☆☆
Uning yüriki
Méhrinsa Ismail/ Nuzugum
Uning yüriki tash demsen?
Yaq tash emes ,
Belki bir danggal ,
Tonimaydu mihri-muhebbet,
Yaki adalet.
Uning közliri suxenchi eynek,
Körsitidu qizil qanlarni,
Jamlarda sherbet.
Uning yüriki tash demsen?
Yaq tash emes ,
Belki bir danggal .
Qizirarmikin axir bir küni,
Insaniyet baghini
Qaplisa janggal.
Uning yüriki tash demsen?
Yaq tash emes
Belki bir danggal.
Chaqsang atesh yanidu tashtin,
Epsus…
Danggalgha yoqtur hich amal.
Girmaniye 2022-yili 6-ayning 2-küni
☆☆☆><☆☆☆
Hayat naxshisi
Autori: Mehrinsa ismail
Her seperde shepeqte,
Her tiniqta nepeste.
Zamanlarning ghurbitide,
Chaqmaqlarning heywitide,
Kördüm men sèni.
Her kèchide tünlerde,
Her chingqi chüsh demlerde.
Yultuzlarning jilwiside,
Yanghan künning dehshitide,
Söydüm men seni.
Her baharning külkiside
Her chèchekning bergiside.
Senemlerning herimide,
Ümidlerning elliyide,
Chüshüdüm seni.
Lekin senchu
Söyümlük hayat?!
Her qedemde seperde,
Her ghenimet demlerde.
Bezen söydüng lewlirimge,
Bezen atting chölliringge,
Dolqunlarda chayqiding rasa,
Qaynamlarda qaynatting taza,
Volqanliring barmidi texi?!
Ot yutqudek küch bar yürekte
Qeqnuslardek tawlandim sende.
Kül bolmaymen,
Köydürimen.
Gül bolmaymen,
Söydürimen.
Neyrengliring aqmaydu emdi,
Chünki hayat tonidim sèni.
2022.7.18. Frankfurt
☆☆☆><☆☆☆
Namert Dunya
Autori: Méhrinsa Ismail/Nuzugum
Dunya boldi jahan saringi,
Usul oynar sapayi ,dapqa.
Kömüp qoyup qazilar heqni,
Qan ichmekte badam doppida.
Jennetlermu toldi zerdapqa,
Perishtiler yighlar samada.
Anglanmamdu nale peryadlar,
Quluplaghliq köz we qulaqlar?!
2022.05.öktebir. Germaniye.
☆☆☆><☆☆☆
Gül naxshisi
Autori: Méhrinsa Ismail
Söyümlük, batur, japakesh uyghur ayallirigha beghishlaymen.
Sen seherde tughulghan qoyash,
Men zawalning zawali sawash.
Sen tünlerge el bop qoysang bash,
Men tughimen tünde ming qoyash.
Sen hayatning nuri buliqi,
Men zinniti,
Taji hem güli.
Sen peqetla künni yorutsang,
Men kün- tünning bèghi -uliqi.
Sen söygüngni tawlap nurungda,
Pesillerni qilisen hapash.
Men ümidni chèchip tupraqqa
Menggülikni ètimen baghash.
Chingqi chüshte köydürse tepting,
Mühebbetke boldum hamildar.
Esir peyti illiqtur chèhring,
Kütsem zar bop weslingdin didar.
Namazshamda chökisen lèkin,
Hèch kütmestin poreklishimni.
Tuymay qalding epsus gugumda,
Tolghaqlarda öksüshlirimni.
Sen tünlerge esir bolghanda,
Men wisalgha yettim hèjranda.
Chècheklirim tughuldi kündek,
Nere tartip achchiq pighanda.
Sen seherde tughulghan qoyash,
Men zawalning zawali sawash.
Sen tünlerge el bop qoysang bash,
Men tughimen tünde ming qoyash.
Èmitimen chècheklirimni,
Her zawalda nur chachmaq üchün.
Aylinimen neshterge oqqa,
Tün köksige sanchilmaq üchün.
Yoruqluqqa teshna dillargha,
Daniel kebiy nur chachmaq üchun!
Yiltizlirim söyer tupraqni,
Bergilirim otqash samada.
Tikenlirim betleglik haman,
Tün yutmaqchi bolsa nawada.
Sen seherde tughulghan qoyash,
Men zawalning zawali sawash.
Sen tünlerge el bop qoysang bash,
Men tughimen tünde ming qoyash!
2023.01. Januar. Frankfurt
☆☆☆><☆☆☆
Qoyash bilen yultuz
(Qizim bilen yazghan shé’irlar)
Autorliri:
Méhrinsa ismal
Wisale kurasch
Quyash éytti yultuzgha :
Sen baghrimdin chéchilghan uruq,.
Yultuz éytti quyashqa:
Men nurungda chaqnaymen toluq.
Qoyash achti ghulachlirini,
Yultuz chachti julalirini.
☆☆☆><☆☆☆
Mungdushush
Ana : sen méning kelgüsige sozulghan yolum.
Qiz : sen méning chidamliq, solmas iradem.
Ana: sen méning wisalim, xushpuraq gülüm,
Qiz : si’en méning bergimde chaqnighan shebnem.
Ana : men yansam ger sham bop tününgde,
Qiz : men aqimen yash bop téningge.
Ana : men chaqnisam quyash bop sende ?
Qiz : men parlaymen cholpan bop kökte!
Ana : yolliringgha payandaz bolay,
Qiz : her söygüngdin küch- medet alay.
Ana : qanatliring yétilgen küni,
Öz qolumda kökke uchuray!.
2023-Yili 5-yning 30-Küni Gérmaniye Frankfurt
☆☆☆><☆☆☆
Quyash Ishqi
Autori: Méhrinsa Ismail/ Nuzugum
Chökme qoyash, patma qoyash,
Héch ketme qoyash.
Séni qoghlap
Ümidler yüdüp,
Boldum shu’an
Aq chachliq ayash.
Koyiqaplar
Sümürdi demler,
Qara öngkür
Hushqurtti better.
Sanga telmürüp
Zoruqtum dehshet,
Emma shu ishqing
Egdürmidi bash.
Qedemlirim
Siljidi shirt- shirt,
Tapanlirim
Qanidi jirt-jirt.
Yalmawuzlar shorisimu qan,
Waz kechmidim
Berdim zor berdash.
Qedehlirim
Tashti sharaptin.
Mey dep qalma,
Qanreng azaptin
Yighlap salsam
Sürtme yéshimni,
U aqqini
Zerdapliq zer yash.
Chökme qoyash, patma qoyash,
Héch ketme qoyash.
Kütkin méni
Yétishey sanga.
Wisalingning
Söyünchisi qip,
Qarchughumgha
Urghin sen tamgha.
Sunup bergin
Tal- tal nurungni,
Uliwalay ipek chéchimgha.
Altun yipqa
Baghlinip uchay,
Léwim tegsun upuqliringgha.
Patma qoyash, chökme qoyash,
Héch ketme qoyash.
Chöksengmu chök
Bir deqiqe
Yürek baghrimgha.
Qan bop nurung
Tomurumda
Aqsa sen taman,
Cholpan külüp asminimda
Hüker köz qisip,
Tanglar atar
Zer yash qatqan
Zinaqlirimda.
2023.06.15 Gérmaniye Bad tabaraz Sanatoriye
☆☆☆><☆☆☆
Newrem Dastangha
Autori:Méhrinsa Ismail/Nuzugum
Hayatimni dawam etting
Yene bir nöwet.
Yéngi tughuldum ,
Söyündum qewet.
Wiliqlaysen
Quyashchaq kebi.
Jimirlaysen,
Ükerdek téxi.
Gire salsang ,
Boyunlirimgha.
Tarar ten’ge,
Béhishning hédi.
Közliringdin
Tériler ümid.
Tilliringdin
Töküler ünche.
Uliqisen
Oghuz bowangning,
Ulap mangghin
Neslingni birge.
Köküsh közliring,
Yaghach shemshiring,
Süttek yüzliring,
Choghdek lewliring,
Bir yadigardur
Uningdin bizge.
Iltijayimdur
Ulugh allahtin,
Ghunche léwingdin
Ketmisun külke.
2023. 06. 04. Badtabars Gérmaniye.
☆☆☆><☆☆☆
Perishtige jawap
Autori:Méhrinsa Ismail/Nuzugum
Axirette sorisa ger perishte mendin:
– Ytqin qizchaq yürikingde némidur iman?
Men iytarmen perishtige héch ikkilenmey:
– Güzel islam imanimdur , rusul taratqan.
U sorisa mendin yene
– Kimdur igeng, dep ,
Késip iytay:
– Qadir allah , süpiti rahman.
Belkim sorar u zat mendin:
– Ejdading kimdur?
Bérey jawap ghorur bilen :
– Batur oghuzxan.
Sorisiken mendin yene perishte sinap:
– Nedin kelding, kindik qéning tamchighan makan?
Teyyar idim qol köturüp jawap bérishke:
– Udur anam
Ewladini pak sütte baqqan,
Udur atam
Ay – yultuzni köklerge yayghan,
Udur heqtin amanet bop
Bizlerge qalghan ,
Baghri zerdap ghezepke
Achchiqqa tolghan,
Güzel qoyni
Shéhit qéni bilen boyalghan,
Héch bash egmey düshmen’ge
Mixtek qadalghan,
Jan tesedduq jennet kebi
Sherqiytürkistan.
2023. 06. 17. Gérmaniye
☆☆☆><☆☆☆
Bir ayal boldum
Autori: Méhrinsa Ismail (Nuzugum)
Bir qiz idim etiwarliq
Közmunchaq asqan.
Bir qiz idim
Mejnuntaldek
Nazuk, uyatchan.
Bir qiz édim ümidlerdin
Tiziqlar tizip,
Arzularni kehriwa qip
Marjanlar asqan.
Bir qiz édim bighubar,
Xéniler yaqqan.
Bu hayatqa méhri bilen
Xushchpiray achqan.
Bir qiz édim eqidemni
Güldeste qilip,
Sadaqetning qoligha sunmaqchi bolghan.
Asta- asta bir ayal boldum,
Sa’adetke yetmekchi bolghan.
Yol süpürüp chachlirim bilen,
Du’alargha ulashmaq bolghan.
Qelem yuqi qollirim bilen,
Altun böshükke muhebbet tangghan,
Xémirimni tindirip qoyup,
Kümüsh qazanni ochaqqa asqan.
Yelkemde dunya yüki özümdin éghir,
Qarnimda kelgüsi–
Hayattin shérin,
Chüchük bext mewsümige qonmaqchi bolghan.
Mana emdi bir ayal boldum,
Hemek nandek otta qizarghan.
Tünglüklerdin chüshmise zer nur,
Aywanlarni yorutmaq bolghan.
Mana emdi bir ayal boldum,
Tün kéchide ay bolup chiqqan.
Zulmetlerde yultuzlar bilen,
Seherlerge gül – chéchek chachqan.
Mana emdi bir ayal boldum,
Qeqnuslardek choghda yuyunghan.
Közlirimni nurlarda chayqap,
Qanatimni köklerge yayghan.
Tumshuqumni tashlarda bilep,
Öz- özümni tughmaqchi bolghan!
2024.06.05 Gérmaniye Frankfurt
☆☆☆><☆☆☆
Sen qal chüshümde
Autori: Méhrinsa ismal
Béshimizni qoyuptuq yerge,
Arimizda newruz chéchiki.
Bilishimche solmush rawurus,
Tasla qaptu qurup qalghili.
Qarchughumdin sirghighan yashlar,
Tökülüpu yumran bergige..
“ Tugishermu?“
Soridim sendin…
Közliringde ümid nurliri.
Barmaqliring, barmaqlirim,
Chimen üstide,
Silar émish yumran shéxini.
Ikki qoldin aqqan mühebbet,
Tökülermish uning ché’éhrige
Del shu söygüdin keldi möjize,
Bash kötürdi solghan yéshilliq.
Közlirimdin chaqnidi ümid,
Hayat derixi küldi yéqimliq.
Chüshlirimde héchqachan séni,
Bunche güzel körmigen édim.
Oyghanmaqni istimes könglüm,
Qal chüshümde
Menggülük söygüm.
Yéshil hayat tünde oyghandi,
Yiltiz tartip
Yerge– yürekke.
Chüshni kim der ré’alliq emes,
Pileklermu yéter pelekke!
Shükür kérek bezi chüshlerge,
Tün ulinar nurluq seherge.
Süküt qilghin ,
Oyghinip ketmey.
Dunya tolsun gülge chichekke.
2024. 22. Dékabir . Gérmaniye
☆☆☆><☆☆☆
Ishikim…
>>>☆<<<
Autori: Méhrinsa Ismail-Kurasch
>>>☆<<<
Ishikim…
Yépip qoysammu,
Kétiwatidu échilip…
Ochuqla turidu,
Kiche we kündüz,
Qoysammu yépip…
Könüp qaptikenmen,
Kirgende échip,
Kirip bolup,
Köngül qoyup taqap ichidin,
Derize we Tunglukni Itip.
Talagha chiqqanda
Pemilep Échip pemilep yépip…Awaylap taqap,
Altun qulupni awaylap sélip.
Mana emdi …
Altun achuqa yénimda,
Ghurur,
Wijdan Qénimda Turup,
Ishikimni,
Achqanlargha yap diyelmeymen,
Yapqanlarni ach diyelmeymen…
Qaynaydu,
Ademiylik qénimda Chapchip.
Ishikimni,
Yaz kelgende
Achalmaymen….
Öyümde xatirjem yashalmaymen,
Ishigimni,
Qish kelgende taqalmaymen…
Güllirimge,
Üshük chüsher zimistanda… Chicheklirim
Qurup kéter sertan issiqta…
Külgende,
Qénip qénip külelmeymen,
Yighlighanda,
Qénip qénip yighkalmaymen,
Ne bahar,
Ne Yaz,
Ne Küz,
Ne Ayaz….
Xeyir keltürdi Baghchamgha…!?
Soghaqta üshüdüm,
Baharda qurudum,
Köydüm hatte tomuz Issiqida…
Ishikim…
Yépip qoysammu,
Kétiwatidu échilip…
Ochuqla turidu,
Kiche we kündüz,
Qoysammu yépip…
Hayat bizge
Zindan boldi,
Dunya bizge tar boldi.
Qishmu Yaz,
Erkinrek nepes alalmiduq,
Yashiduq dekke, dükke ichide…
Küz yaprighidek janlar Alqanda!
Bahardek bahar chillaymen…
Ishikimni,
Özem taqap,
Özem achsam deymen,
Yazdek Yaz Arzulaymen….
Küz kelsun,
Bashqalargha kelgendek Altundek….
Ishigimni Özem
Taqisam deymen,
Qish kelse,
Mawjudatlar uxlisa,
Tatliq istirahet sürse janiwarlar,
Bir chüsh körsun,
Hürlük tangliri étip,
Illiq quyash nurini chéchip,
Etrapqa Yaz méhrini, Yamghurdek Töküp,
Asmangha ésilip Turghan bir ilahiy bulutlardek!
>>>☆<<<
Bahardek bahar chillaymen…
Ishikimni,
Özem taqap,
Özem achsam deymen,
Yazdek yaz arzulaymen….
Kelse eger
Manga bahar kelsun,
Kelse eger
Manga yaz kelsun,
Kelse eger
Manga küz kelsun,
Kelse eger
Manga qish kelsun,
Mawjudatlar uxlisa,
Tatliq istirahet sürse jel-janiwarlar,
Qishliq üchekke kirsun.
Bizgimu tanglar atsun,
Bizgimu bahar kelsun,
Hürlük tangliri étip,
Illiq quyash nurini chéchip!
Yazdek yaz arzulaymen….
Kelse eger
Manga bahar kelsun,
Kelse eger
Manga yaz kelsun,
Kelse eger
Manga küz kelsun,
Kelse eger
Manga qish kelsun!
Quyash chiqsun,
Etrapqa yaz méhrini, Yamghurdek Töküp.
Ay parlisun,
Yultuzlar chaqnisun,
Muhabbet yaghdursun,
Insanlar Bir birige, Kökte Üzüm sapaqliridek,
Sanggilap Turghan ilahiy bulutlardek!
Bashqalargha kelgendek,
Qip qizil altundek….
Yaz kelse,
Ishikimni özem Achsam deymen,
Dedrexlirim,
Özemning hoylisida chicheklise,
Küz Kelse,
Yapraqlirim ghazang bolup,
Öz hoylamgha tökülse,
Qish kelse,
Appaq qarda,
yurt makanim chümkelse,
Soghaq kirse,
Ishikimni özem Taqisam,
Bahar kelse yene özem achsam deymen!
12.11.2024
2026-Yili 04-Ayning 10-Küni
Bu Eserlerni Merhumning Eri Kurasch Umar Atahan Ependi Neshirge Teyyarlidi
Tengritagh Akademiyesi 