RFA/Arslan
Merkizi istanbulgha jaylashqan Uyghur akadémiyesi 23-24-awghust künliri kéngesh ötküzüp, yéngi nöwetlik idare hey’etlirini saylap chiqti.
Saylam démokratik shekilde bélet tashlash usuli bilen ötküzülgen bolup, yéngidin saylap chiqilghan namzatlar Uyghur akadémiyisining idare hey’etliri terkibidin orun aldi.
Uyghur akadémiyisining yéngi nöwetlik re’islikige türkiyening izmir shehiridiki ege uniwérsitéti türk dunyasi tetqiqat institutining proféssori, doktor alimjan inayet ependi saylandi. Uyghur akadémiyisining yéngi nöwetlik idare hey’itining da’imiy ezaliqigha proféssor alimjan inayet, doktor perhat qurban tengritaghli, doktor shewket nasir, doktor meghpiret kamal we abdulhemit qaraxan qatarliq kishiler saylandi.
Bu qétimliq saylamda Uyghur akadémiyisining sabiq re’isi abdulhemit qaraxan ependi akadémiyening yéngi nöwetlik ijra’iye re’islikige, perhat qurban tengritaghli bash katipliqqa saylandi.
Uyghur akadémiyisining bu qétimliq saylam netijisi 25-26-awghust künliri élan qilin’ghan bolup, Uyghur akadémiyisining yéngi nöwetlik re’isi alimjan inayet bilen ijra’iye re’isi abdulhemit qaraxan saylam netijisini oqup ötti.
Uyghur akadémiyisining ijra’iye re’isi abdulhemit qaraxan ziyaritimizni qobul qilip, Uyghur akadémiyisining xizmet pa’aliyetliri toghrisida qisqiche melumat berdi. U Uyghur akadémiyisining bu yil 5-ayda amérikida shöbisi qurulghanliqini, buningdin kéyin yawropa elliri, yaponiye we ottura asiya döletliridimu Uyghur akadémiyisining shöbilirini échish pilani barliqini tekitlep ötti.
Abdulhemit qaraxanning bildürüshiche, Uyghur akadémiyesi 2009-yili 9-ayning 9-küni muhajirettiki bir qisim ziyaliylar, bilim igiliri we oqughuchilarning birlikte uyushushi bilen istanbulda qurulghan iken. Hazir dunyaning herqaysi jaylirida Uyghur akadémiyisining 80 neperdin köprek ezasi bar bolup, ezalar sanini 300 ge yetküzüsh pilani bar iken.
Uyghur akadémiyisining yéngidin saylan’ghan re’isi alimjan inayet ependi ziyaritimizni qobul qilip, Uyghur akadémiyisining bu qétimliq saylam kéngishi we saylam élip bérishtiki konkrét sewebler toghrisida toxtaldi. U Uyghur xelqi tarixning eng qiyin mezgilliride turuwatqan bügünkidek bir qiyin mezgilde Uyghur bilim igilirining choqum oyghinishi kéreklikini, buningda Uyghur akadémiyisining öz rolini toluq jari qildurup, muhajirettiki Uyghur ziyaliylirining bilim we eqil küchidin paydilinish hemde uni Uyghur xelqining nöwettiki qiyin ehwalidin qutulushi üchün xizmet qildurushqa yéteklishining zörürlükini alahide tekitlep ötti.
Tepsilatini yuqiriqi awaz ulinishtin anglighaysiler. arslan
Tengritagh Akademiyesi 