Jahanda Hemmidin Uyghur Bolmaq Tes

26055550_277696702758678_3344552919268052183_n

Bawudun Niyaz(1939 – 2008)

Tepilmas dunyada bizdek natiwan,
Jahanda hemmidin Uyghur bolmaq tes.
Yat eldin kelgenler bizge hökümran,
Jahanda hemmidin Uyghur bolmaq tes.

Ezeldin bir emes tilimiz bizning,
Qoshulmas zadila qenimiz bizning.
Qandaqmu bir bolsun dilimiz bizning,
Jahanda hemmidin Uyghur bolmaq tes.

Cheylendi gül weten, iplas ayaqta,
Bu hayat shatliqtin bekmu uzaqta.
Muqeddes arzular qaldi qayaqta,
Jahanda hemmidin Uyghur bolmaq tes.

Altunning üstide dessep turimiz,
Emma bek qisqidur bizning qolimiz.
Nimishqa shunche tar bizning yolimiz ?
Jahanda hemmidin Uyghur bolmaq tes.

Yer – zimin bizningki, bayliq bizningki,
Tangritagh perzenti oghul – qizningki.
We lekin dert – elem hesret bizningki,
Jahanda hemmidin Uyghur bolmaq tes.

Tar keldi özimiz törelgen weten,
Dozaqqa aylandi jennettek gülshen.
Quzghunlar makani boldi gül – chimen,
Jahanda hemmidin Uyghur bolmaq tes.

Talay ret at salduq, kélip gheyretke,
Qehrimiz yalqunjap tolup nepretke.
Yenila yar bolduq qayghu – hesretke,
Jahanda hemmidin Uyghur bolmaq tes.

Eslisek bizdimu köp iken illet,
Shunglashqa ghepletke qaptu bu millet.
Qeni shu ejdatlar yaratqan xislet ?
Jahanda hemmidin Uyghur bolmaq tes.

Yuwashliq qilip biz qalduq balagha,
Yetmidi ahimiz kengri samagha.
Duch kelduq talay ret sulhi salagha,
Jahanda hemmidin Uyghur bolmaq tes.

Ingraydu elemdin miskin xelqimiz,
Titreydu ghezeptin dertlik qelbimiz.
Hich bundaq emesti bizning tektimiz,
Jahanda hemmidin Uyghur bolmaq tes.

Ketkechke köp qétim qoldiki purset,
Biz ajiz, reqipler boldi bequwwet.
Igiler we lékin sunmas heqiqet,
Jahanda hemmidin Uyghur bolmaq tes.

Gherpni acharken sherqtin kélip,
Bularken talarken gejgige minip.
Biz bolsaq wetende musapir gherip,
Jahanda hemmidin Uyghur bolmaq tes.

Tizilghan heywetlik ret – ret imaret,
Qilidu uningda kimler tapawet ?
Uyghurgha bu jayda barmu ijazet ?
Jahanda hemmidin Uyghur bolmaq tes.

Ittipaq inaqliq sözliner shunde,
Barawer tengliktin esir yoq qilche.
Herqachan hemradur bizge ghem – ghusse,
Jahanda hemmidin Uyghur bolmaq tes.

Qarisang közüngni oyumen deydu,
Sözliseng tilingni késimen deydu.
Könmiseng qéningni ichimen deydu,
Jahanda hemmidin Uyghur bolmaq tes.

Ziminni qaplidi ahimiz bizning,
Pelektin halqidi zarimiz bizning.
Daima perishan halimiz bizning,
Jahanda hemmidin Uyghur bolmaq tes.

Tangritagh baghrida huwlaydu boran,
Neshterdek sanjilar mudhish shiwirghan.
Bahardin Dérek yoq bunda hich – qachan,
Jahanda hemmidin Uyghur bolmaq tes.

Ot yürek Sadirning ewladi qéni,
Alemni titretken ejdadi qéni ?
Géstonni gum qilghan Perhadi qeni ?
Jahanda hemmidin Uyghur bolmaq tes.

Zulmette Ay – Yultuz sirdashtur bizge,
Höriyet – Erkinlik dildashtur bizge.
El – weten her waqit mungdashtur bizge,
Jahanda hemmidin Uyghur bolmaq tes.

Türülüp ghezeptin bilek bir küni,
Ot bolup yanidu yürek bir küni.
Ashidu emelge tilek bir küni,
Dimeymiz shu chaghda Uyghur bolmaq tes.

2006 – yili, Ürümchi

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s