– Dr. Mahire Haji Ekber –

Men ayal,
En’giliyelik ayaldek,
Girmaniyelik ayaldek,
Yaponiyelik ayaldek.
Beden tüzülüshüm periqlenmeydu,
Amérikiliq ayaldin,
Zongtungning xanishi hilaridin …
Senemdin,amannisadin,leylidin…
Men ayal,
Zilwa ösken serwidek.
Melikidek, peridek.
Men ayal,
Romantik firansiyelik ayaldek,
Lékin ténimdin taralmas,
Firansiye ettirining xushbuy purighi,
Belkim chéchimgha singip ketkendu,
Men etken poluning mizilik hidi…
Belkim chachlirim uningdek tal-tal emes,
Lékin oxshutup étimen chachtek leghmenni.
Uninggha singdürimen
Chéchimdinmu uzun muhebbetni
We yaki hesretni…
Özgiler qehweni ésil deydiken,
Qehweni öziche hayat deydiken.
Lékin men qehwe emes,
Men özem künde étidighan,
Tuz-temi tétighan qaymaq chay,
Xeqler her küni ichidighan,
Lékin gépini qilishmaydighan,
Nerqinimu sorimaydighan…
Men bolka emes ,
Téshi körkem ichi kawak,
Men quyash nan,
Üch waq yisimu zérikmeydighan,
Bahasi asanliqiche örlimeydighan,
Birer abroy orunni közlimeydighan.
Men unchiwala hewes qilmaymen…
Kinolardiki we yaki ay sharidiki,
Erliri gül bérip turidighan ayallargha,
Chünki méning qolum gül,
Öyüm gül, hoylam gül,
Qazan qomush choylam gül,
Gülümni bérip turimen gahida,
Gül ünmigen baharlargha…
Chöl – deshtilerge saylargha.
Men hewes qilmaymen
Éridin ma’ash alidighan
Yaponiyelik ayalgha,
Chünki men özem heqni halal tapimen,
Gézi kelgende bir öynimu baqimen,
Halal yashap pak yashap,
Égisining aldigha meghrur barimen…
Men heset qilmaymen,
Tamaq etmisimu bolidighan ,kitab yazidighan
Gollandiyelik ayalgha,
Men kitabni yürikimde yazimen,
Kitab yazidighan qolum xémirda,
Arzulirim ,armanlirim yalqunjaydu,
Yürekning chongqur qétida …
Men chong bilmeymen anna axmatuwani,
Chünki méning qelbim uningdin otluq,
Ilhamlirim déngizdin dolqunluq,
Misralirim hararetlik yalqunluq.
Peqet basalmighanda,
Érimdin yoshurunche yéziwalimen,
Érim kirse asta tiqiwalimen,
Yaki qazan béshigha ötüwalimen,
Oqup bérimen aylargha, yultuzlargha,
Qushlargha, qumushlargha,
Ular shundaq hozurlinidu,
Érim putbol musabiqisidin hozurlan’ghandek….
Men uyghur ayal,
Men xotenlik ayal,
Érim bilen étizda kechkiche ishlep harmaydighan,
Men bolmisam öyde birer waq qazan qaynimaydighan.
Men ghuljiliq ayal,
Érimning yaqisidiki changni sümüriwalidighan.
U emgek qilmisimu ,
Etigini uzutup kechte chirayliq kütüwalidighan.
Men atushluq ayal,
Her éghir yüklerni ,
Érimgha bermey kötürüwalidighan.
Men uyghur ayal,
Érim künlep qalghan sayemgimu ,
Ikkinchi qarimaydighan,
Manga baqmay kün’ge baqti dep doq qilsa,
Güllirimu ikkinchi aynimaydighan.
Men uyghur ayal,
Érimni egip yürgen yaki érim béqip yürgen,
Yawa qushlarni ashkare qoghlimaydighan.
Héch bolmisa bashqilarning aldida sorimaydighan.
Hem ghurursiz hem ghururluq,
Hem wijdansiz hem söyümlük.
Eng qimmetlik ghururimni,
Tégisheleymen balilirimgha.
Yürikimning parilirigha.
Köksi qarnim teklimakandek,
Merd – merdane sadir palwandek.
Yutiwétimen taghdek ghemlerni,
Kechüriwétimen erdek erlerni,
Lékin kechürelmeymen kechürginimni.
Men uyghur ayal,
Kötürüshchan köyümchan,
Sewrichan, rehimchan,
Shapa’etchan, qana’etchan.
Men uyghur ayal
Bir erni qiriq yil söyidighan,
Bir otta qiriq yil köyidighan,
Hemmige üntinsiz könidighan.
Men uyghur ayal,
Tömür ayal emes,
Menmu charchaymen,
Upraymen,
Muzlaymen.
Qish uzirap ketse,
Bahargha telmürimen,
Illiq mart shamiligha,
Telpünimen yene telpünimen.

Menbe: Ündidar sehipiliri