„Izchilar guruppisi“ namdiki Uyghur oqughuchilar uyushmisining uyushturushi bilen istanbul tijaret uniwérsitétidiki qiz-oghul Uyghur oqughuchilar bir jaygha jem bolup, „Dunya kitab oqush küni“ ni tebriklidi we kitab oqush pa’aliyiti élip bardi.

23-Aprél küni yene türkiyening bashqa bir qanchilighan aliy mektepliride oquwatqan Uyghur oqughuchilar arisida kitab oqush we kitab tarqitish pa’aliyiti élip bérilghan.

Biz bu pa’aliyet toghrisida téximu tepsiliy melumatqa érishish üchün kitab oqush we tarqitish pa’aliyiti uyushturghan istanbuldiki tijaret uniwérsitétining Uyghur oqughuchiliri bilen söhbet élip barduq.

Istanbuldiki tijaret uniwérsitéti xelq’araliq tijaret fakultétining oqughuchisi abdulla qurban bu pa’aliyetning meqsiti toghrisida toxtilip, mundaq dédi: „Uyghur oqughuchilar arisida dunya kitab oqush künini xatirileshtiki meqset shuki, ‚Uyghurlar kitab oqumaydu‘ dégen xata chüshenchige xatime bérish, kitab oqushqa adetlinishning muhimliqini xelqimizge bildürüsh, Uyghurlar arisida kitab oqush qizghinliqini ashurush, meniwiyitimizni béyitish hemde kitab neshr qilish we kitab sétiwélish éngimizni yenimu kücheytish üchündur.“

Abdulla qurbanning bildürüshiche, „Izchilar guruppisi“ diki Uyghur oqughuchilar „Uyghurlar“, „Sherqiy türkistan tarixi“, „Iz“, „Ghéni batur“, „Köz yéshida nemlen’gen zémin“ qatarliq 300 parchidin artuq Uyghurche kitabni türkiyediki her qaysi uniwérsitétlarda oquwatqan Uyghur oqughuchilargha tarqatqan.

Istanbuldiki sabahettin za’im uniwérsitéti islami bilimler fakultétining oqughuchisi feruq muhemmed kitab oqush pa’aliyitining ehmiyiti toghrisida toxtilip, mundaq dédi: „Wetinimiz sherqiy türkistanda ana tilimizni öginish we Uyghurche kitablarni neshr qilish chekliniwatqan bügünki künde muhajirettiki Uyghurlar arisida kitab oqush we tarqitish pa’aliyiti élip bérish muhim ehmiyetke ige bir ishtur. Istanbuldiki Uyghur oqughuchilarning ‚izchilar guruppisi‘ namliq uyushmisi teripidin dunya kitab oqush künide bundaq bir pa’aliyetni ötküzüshi muhajirettiki Uyghurlar arisida kitab oqush we tarqitishtek bir ilmiy keypiyatni yaritishta türtkilik rol oynaydu, dep qaraymen.“

Feruq muhemmed yene „Izchilar guruppisi“ teripidin 2018-yilliq kitab oqush pa’aliyiti teshkillishi bilen türkiyediki Uyghur yashliri arisida kitab oqushni omumlashturush we buninggha adetlinishtek bir keypiyatning asta-asta körülüshke bashlighanliqini ilgiri sürdi.

Igilishimizche, 1995-yili ispaniyening barsélona shehiride jem bolghan „Dunya neshriyatchilar birliki“ qurltay chaqirip, her yili 23-aprél künini „Dunya kitab oqush küni“ qilip békitken. Shu yili yene b d t ilim-pen, ma’arip we medeniyet komitéti teripidin her yilining 23-aprél küni „Dunya kitab küni“ qilip békitilgen.

Abdulla qurban „Izchilar guruppisi“ ning ghaye we meqsetliri toghrisida toxtilip, mundaq dédi: „Izchilar guruppisining ghaye-meqsetliri bolsa ma’aripni asas qilghan, milletning sapasini ashurush we yükseldurushni meqset qilghan. Bu guruppa türkiyediki her qaysi uniwérsitétlarda oquwatqan Uyghur oqughuchilardin teshkillen’gen bir guruppidur.“

Abdulla qurbanning bildürüshiche, „Izchilar guruppisi“ 2018-yilliq mukapatliq kitab oqush pa’aliyiti teshkilligen bolup, uning küntertipide türkiyede turushluq Uyghurlargha „Izchilar guruppisi“ namidin sétiwélin’ghan kitablarni heqsiz we héchqandaq shert qoymighan asasta yetküzüp bérish, oqughan kitab sani we yazghan tesirat maqalsigha qarita birinchi derijilik oqurmen’ge 1000 lira, ikkinchi derijilik oqurmen’ge 700 lira, üchinchi derijilik oqurmen’ge 500 lira mukapat bérish hemde qerellik kitab chayliri orunlashturush qatarliq bir qatar muhim pa’aliyetler orun alghan iken.
http://uyghurpedia.com/index.php?title=Uyghur_Ali_Terbiye_Programmisi_300_Kitab
Biz „Izchilar guruppisi“ din kitab ariyet élip oqughan kastamonu uniwérsitétining oqughuchi arapat ablikim bilen söhbet élip barduq. Arapat ablikim „Izchilar guruppisi“ ning kitab oqush pa’aliyiti uyushturghanliqidin we özige kitab ewetkenlikidin söyün’genlikini bildürdi we „Izchilar guruppisi“ gha rehmet éytti.