Semet Dugayli

Ataqliq yazghuchining wapati uyghurlarni chongqur qayghugha tashlidi
Tarqitilish 16.03.2016 yéngilinish 16.03.2016 AA
Hazirqi zaman uyghur edebiyatining meshhur namayendisi, ataqliq yazghuchi, edebiy terjiman we zhurnalst Semet Dugaylining wapati weten ichi – sirtidiki uyghurlarni chongqur qayghugha tashlidi.

Türkiye awazi radiyosi xewiri: melumatlargha qarighanda, ataqliq yazghuchi semet dugayli 2016-yili 15-mart seher sa’et 3:30 etrapida ürümchide késellik sewebi bilen 69 yéshida bu dunya bilen menggülük widalashqan. Uyghurlar merhum yazghuchigha bolghan qayghuluq hés – tuyghulirini ammiwi taratqulardiki teziyenamiliri-mersiyeliri arqiliq ipadiligen.
Semet Dogayli 1947-yili qeshqer yéngisheher nahiyiside tughulghan, deslepte qeshqer pédagogika instituti edebiyat fakoltitida oqutquchiliq qilghan. Kéyin béyjing milletler neshriyatida tehrir muherri bolup ishligen.

Dangliq edip Semet Dugaylining hazirghiche «nurluq qelbler», «gül’ayim», «hayat shamalliri» (3 qisim) qatarliq romanliri, «qachqun karwan», «éqin», «roza héytning tunji küni» qatarliq hékaye-powést toplamliri neshr qilin’ghan. Igilinishiche, semet dogayli béyjing milletler neshriyatida ishligen mezgilliride seypidin ezizining «sutuq bughraxan», «ömür dastanliri» namliq eserlirining tehrirlik xizmitini öz üstige alghan bolup, bu eserlerning bedi’iy qimmitige semet dogaylining nahayiti köp ejri singgenliki uyghurlar arisida teriplinip kelgenidi.